NAGA CITY- Mahigot an pagpapautob kan lokal na gobierno kan Buhi sa mga ordinansa partikular sa pagbabawal sa electrofishing asin pagdakop nin sinarapan.
Sa entrevista kan Bombo Radyo Naga ki Jovenson Narra, Lake Development Designate kan LGU-Buhi, sinaysay kaini na padagos an saindang monitoring asin pagpapatanid sa mga parasisira asin saindang mga residente na nagtitinir na bawal an paggamit nin kuryente sa pagsira sirimngman an pagdakop kan sinarapan o an pinakadasadit na sira na makukua sa saindang danaw.
Sigun ki Narra, igwang magkakanigong penalidad asin kapadusahan an pwedeng kahampangon kan siisay man na mapatotoohan na nagbalgar sa nasambitan ng ordinansa.
Katakod digde, sa enot na pagbalgar warning an itatao kan saindang lado alagad enkaso liwat na mag-utro penalty asin confiscation kan saindang gamit sa pagsira an kakapulian.
Paliwanag kan opisyal, importante na magsunod an publiko sa nasambitan ng panundunan orog na ta para ini sa ikakarahay kan komunidad partikular sa mga pigkukuanan nin hanap-buhay, siringman pigsaysay pa kan opisyal na endemic na an sinarapan kaya kaipuhan ining maproteheran.
Sa ngunyan, hagad na sana ni Narra an kooperasyon kan publiko para sa mas marhay na implementasyon kan saindang mga ordinansa.
