NAGA CITY – Tinawan duon kan sarong konsehal kan siyudad nin Naga na bilog an suporta kan Naga City Officials sa mga miyembro kan LGBTQIA+ Community sa saindang pagselbarar kan Pride Month ngunyan na bulan kan Hunyo.
Sigun ki City Councilor Gayle Abonal Gomez, an nasambitan ng selebrasyon an komo pagpapahiling sa progseso na naaabot kan nasambitan ng mga grupo sa gabos na saindang pigbubusol orog na sa pagkakapantay-pantay asin pagrespeto kan saindang derechos.
An laban na pinag-agihan soboot kan mga miyembro kan LGBTQIA+ Community an pano nin courage, resilient, asin dae matatawaran na committment sa pag-abot kan hustisya.
Katakod kaini, sa ibong kan mga signipikanteng pagbabago importante pa man giraray na tawan nin pansin an kadakol pang problema na kaipuhan masimbagan orog na kun an pag-uurulayan an karapatang pantawo.
Pigtawan duon pa kan opisyal na an selebrasyon kan Pride Month an pagpapahiling naman kan pagigin proud sa identity kan sarong indibidwal sa ibong kan mga kinahampang na mga problema sa komunidad.
Sa ngunyan, pigsierto na sana ni Gomez na yaon an LGU-Naga na masuporta sa anuman na aktibidad para sa ikakarahay kan mga miyembro kan LGBTQIA+ Community asin kan gabos na residentes kan siyudad nin Naga.
