NAGA CITY- Dae uyon an lokal na gobierno kan Naga na langkawan an domestic tax sa syudad.
Sa nagin paghampang sa mga kagawad kan media ni Naga City Mayor Nelson Legacion, sinaysay kaini na namamatian pa hasta ngunyan an epekto kan pandemya kan Naga kun kaya dae advisable na magpautob nin paglangkaw digdi.
Ini orog na ta huli sa pandemya kadakol na mga negosyo an nagsara asin igwa nin mga residentes na nawaran nin trabaho.
Dae kaya soboot malilikayan na enkaso maglangkaw an buwis malangkaw man an ibang bagay tanganing mapalangkaw an revenue o kita kan mga ini na makakaapektar man sa mga ordinaryong residente.
Dugang pa ni Legacion, padagos na pigsisimbagan kan saindang lado an mga isyu na nagruruluwasan ngunyan asin pinagsugo naman kaini an manlaen-laeng ahensya kan LGU na magpreparar na kan saindang mga simbag sa nasambitan ng isyu.
