NAGA CITY – Igwa nang nakapreparar na tabang an lokal na gobierno kan siyudad nin Naga sa mga educare center na nadanyaran kan nakalihis na bagyong Kristine kasabay kan pagselebrar kan National Children’s Month ngunyan na bulan.
Sa entrevista kan Bombo Radyo Naga ki Elmer Baldemoro, Naga City Focal Person, sinaysay kaini na igwa soboot itatao na school supplies sa labi 50 na educare center na inabot kan baha kan nakalihis na bagyo.
Katakod kaini, piglinaw kan opisyal na bako gabos an matatawan nin huli ta eenoton an mga labing nadanyaran na mga educare center.
Dugang pa ni Baldemoro, apwera sa school supplies, nagkaigwa naman nin pag-inspekyon an lado kan City Engineers Office para sa pagpapakarhay kan mga labing naraot na pasilidad.
Sa ibong na lado, isasagibo man sa aga, November 29, 2024 an children’s report kun saen isasaysay ni Mayor Legacion an mga programa asin accomplishment para sa mga kaakian.
Pigsaysay pa ni Baldemoro na kun ikukumparar soboot sa nakalihis na taon, mas kadakol an program sa presenteng taon.
Sa ngunyan, kaplanuhan kan LGU-Naga na itukdo sa mga kaakian an pagigin resilient asin magin parte kan Disaster Preparedness tanganing malikayan an casualties sa panahon kan kalamidad.
