Pig-inspeksyon na an mga pasilidad para sa mga tawong may kapansanan sa panghiling asin pangdangog sa Naga City, partikular an Resource Center for the Blind, tanganing maipaayos asin mas mapahusay an mga serbisyo para sa sektor.
Sa intrevista kan Bombo Radyo Naga ki Felix Palayar Chavez, Administrative Aide 1 kan Resource Center for the Blind Naga City, sinabi kaini na may mga nagbisita na sa sentro tanganing inspeksiyunon an presenteng kondisyon kan mga pasilidad asin pag-adalan kun paano ini mapapaayos, pati na an mga pasilidad para sa mga deaf.
Dagdag pa ni Chavez, kabali sa mga gustong maisulong kan mga namamayo kan ciudad an pagkakaigwa nin digital hub asin tultol na lugar para sa mga tawong may kapansanan sa panghiling asin pangdangog.
Segun sa opisyal, sarong welcome development para sa sektor an mga hakbang na ini asin patunay na an Ciudad kan Naga nagsusulong nin inklusibong pamamahala asin good governance.
Nagpasalamat man si Chavez sa Local Government of Naga City sa pag-ataman asin pagpaayos kan saindang opisina asin mga pasilidad.
Tinawan-duon ni Chavez na dakulang tabang an mga pasilidad na ini tanganing malinang an kaaraman kan mga benepisyaryo, magin mas inklusibo an saindang pamumuhay, asin mabuksan an mas dakulang oportunidad para sa paghahanap nin trabaho.
