NAGA CITY- Ipapahali na kan LGU-Naga an mga nakatambak na behikulo asin mga kagamitan sa City Hall Compound.
Sa nagin paghampang sa mga kagawad kan media ni Naga City Mayor Leni Robredo, sinaysay kaini na obheto kan nasambitan ng lakdang na magkaigwa nin mahewas na parking space sa laog kan City Hall.
Sigun ki Robredo kadakol na mga behikulo na haloy naman na dae pigagamit an nakatambak na sana na nakakadugang pa sa kawaran nin marhay na espasyo sa lugar.
Katakod digde, nagbilog na soboot sinda nin task force kun saen an gabos na motor vehicles na dae na naggagamit o dae na nag-aandar an bubutungon asin ilalaag sa sarong area. Pighihiling na ini an paramientras na ibubugtak sa may City College of Naga sa parte kan Almeda.
An nasambitan ng lakdang an parte kan mga pagbabago o pag-upgrade na gigubuhon kun pinag-uurulayan an parking space.
Mientrastanto, pigpaplanuhan an pagkakaigwa nin bagong desinyo kun kabali na an pagkakaigwa nin multilevel na parking.
Igwa na soboot urban planners na pighahagadan nin tabang kaibahan na an pagbilog nin mga buildings.
Sa ngunyan, pigsierto na sana kan alkalde na padagos an saindang piggibong mga programa asin proyekto para sa ikakarahay kan siyudad nin Naga.
