NAGA CITY- Liwat na pig-activate kan lokal na gobierno kan Naga an Peñafrancia Joint Operations Center (PJOC) tanganing masierto an marhay, salbado asin solemne na pagkundusir kan Peñafrancia Fiesta ngunyan na taon.
Marurumduman, an Peñafrancia Festival, an pigkokonsederar na saro sa pinakadakulang Marian festivals sa Southeast Asia kun saen milyon na mga deboto, pilgrims, turista, miyembro kan clergy, asin government officials an nakikisumaro digde.
Katakod kaini, nagpaluwas si Naga City Mayor Leni Robredo nin Executive Order No. 020 na nagre-reactivate kan PJOC, na maserbeng central hub para sa koordinasyon, komunikasyon asin kontrol sa bilog na durasyon kan selebrasyon sa Setyembre.
Pigtawan duon kan alkalde an importansiya sa pagkakaigwa nin epektibo asin episyente na sistema tanganing mamanehar an anuman na kasuguan, coordination, collaboration, asin communication sa nasabimtan ng aktibidad.
An Peñafrancia Fiesta, tradisyunal naman na pigseselebrar sa Naga City komo sentro kan katolisismo asin hararom na pagtubod ki Our Lady of Peñafrancia sa Bicol Region.
An nasyunal na importansiya kaini an pigbisto sa paagi kan Presidential Executive Order No. 33, series of 2010, na kun saen nagdedeklarar sa Naga komo Pilgrimage Capital of the Philippines.
An deriktiba nagmamandato man na an gabos na aktibidad kaipuhan maisagibo nin matuninong asin solemne sa paagi kan pusog na suporta kan gobierno.
Sa ngunyan, puspusan an pigsasagibong preparasyon kan LGU-Naga para sa nararaning selebrasyon kan Peñafrancia Fiesta sa bulan nin Setyembre.
