NAGA CITY – Nakapreparar na sa panahon nin tag-uran an lokal na gobyerno nin Naga.
Sa nagin paghampang sa mga kagawad kan media ni Allen Reondanga, Head CDRRMO, sinaysay kaini na sa sigun soboot sa weather state bureau na sa bulan nin hunyo hasta sa bulan nin setyembre laoman an makukusog na pag-uuran huli man sa pagpuon kan rainy season o habagat season.
Dugang pa kaini na an habagat asin LPA makukusog na pag-uuran an dara sa nasyon kaya susog soboot sa kasuguan ni Mayor Nelson Legacion pigpa-activate kan siyudad an gabos na mga barangay risk reduction management council o management committees na kun saen nagpaapod man nin meeting an opisina kan City Disaster Risk Reduction Management Office sa gabos na mga Kapitan, SK Chiarmans, asin BRRM Focal persons tanganing magpuon na paghiro kan mga response actions.
Katakod kaini, puon kasuodma hasta sa masurunod na semana, mapuon na paglinig kan mga barangay siring man igwang ginibong programa an siyudad na kun saen sa laog nin duwang aldaw kada barangay igwang alokasyon na numero kan indibidwal na sarabay-sabay kan paglinig kan mga drainages na iyo man an mayor na dapat linigan tanganing makabwelo an tubig-baha sa pag-agi asin tanganing dae na magkawsa nin pagbaha orog na sa mga low-lying areas.
Pigtawan-duon pa ni Reondanga na komo pag-andam, igwa na soboot sindang koordinasyon sa mga evacuation centers kun saen maapod man nin meeting an saindang opisina sa mga school heads tanganing pag-urulayan an localized suspension of classes tanganing malikayan an manlaen-laen na interpretasyon kan mga principals sa interpretasyon kan nasa college levels.
