NAGA CITY-Tolong six-wheeler truck na pano nin mga donasyon an ipinanao ngonyan kan lokal na gobyerno kan ciudad nin Naga sa mga evacuees sa probinsya nin Albay.
Pasado alas-5:30 nin aga subago kan magbyahe an grupo hale sa ciudad nin Naga na pinangengenotan ni Mayor John Bongat.
Apwera sa food packs, bagas asin bottled waters, mayor na laog kan nasambitang mga truck an mga hygiene kit arog kan toothbrush, toothpaste, sanitary napkin, diaper asin iba pang mayor na kaipuhan kan mga residenteng paramientras na nagtitinir sa evacuation centers.
Benipisyaryo kan nasambitang tabang an mga evacuees sa banwaan nin Camalig, Guinobatan asin Ligao City.
Labi man an pasasalamat kan LGU-Naga sa gabos na mga nakisumaro asin nagtabang sa saindang piglunsar na #tabangmayon2018.
