NAGA CITY- Opisyal nang pig-turnover gikan sa DOH-Bicol an 12 na Hemodialysis Machines sa Naga City General Hospital.
Sa nagin patara-tara ni Naga City Mayor Nelson Legacion, sa ginibong seremonya kasuudma, Marso 12, 2025 sa Dialysis Center, sinaysay kaini na libre an serbisyo kan dialysis machine sa mga pasyente kan siyudad asin mga pagtaraid na banwaan na igwang Chronic Kidney Disease.
Sigun ki Legacion, parte kan saindang vision sa siyudad nin Naga sa paglaog kan 2030 an mabisto komo model pag-abot sa ladangan kan salud sa bilog na nasyon.
Huli kaini, padagos soboot an saindang paglalapigot tanganing magin abot-kaya asin mairani sa publiko an marekas asin marhay na access sa ospital sa paagi kan Naga City General Hospital.
Katakod digde, an mga ekipaheng saindang nareseber an makakatabang nin marhay para sa mga pasyente orog na sa dae na kayang magbiyahe nin halawig huli ta maseserbisyuhan sinda kan nasambitan ng dialysis machine.
Kasabay din kaini, kamawotan kan LGU-Naga na magin Level II Hospital an Naga City General Hospital na kayang mag-akomodar sa mga nangangaipuhang pasyente sa paagi kan pagkakaigwa nin nasa 200 hospital beds.
An pagdugang sa hospital beds nangangahulugan na kadakol man an maseserbisyuhan na mga pasyente.
Mienrastanto, dakula man an katabangan kan sarong Senador nin huli ta an budget na ginamit sa mga ekipahe sa dialysis center an gikan digde asin sa presente an igwa pang pigtao na nasa P15-M.
Sa ngunyan, pigsierto na sana kan Alkalde na padagos an saindang paglalapigot tanganing makapagtao nin marhay na serbisyo sa salud sa gabos na mga Nagueños asin mga pagtaraid na banwaan.
