NAGA CITY – Pigpaplano kan lokal na gobierno kan siyudad nin Naga na pakarhayon an mga buildings orog na an mga luma na huli sa nangyaring insidente kan linog sa Cebu.
Sa nagin paghampang sa mga kagawad kan media ni Naga City Mayor Leni Robredo, sinaysay kaini na antes pa an nangyaring pagyugo-yugo sa Cebu nakaresiber na sinda nin tangrio gikan sa CEO asin Philippine Institute volunteers kan civil engineers na magkundusir nin walling.
Dugang pa kan opisyal ini na an tamang oras tanganing iprayoridad an nasambitan ng programa tanganing masierto na pusog an mga edificio sa siyudad.
Partikular na pigtukoy kan alkalde an mga lumang buildings siring kan city hall asin an market orog na ta igwang kahaluyan na an mga ini.
Mientrastanto, bako sana an mga lumang buildings an prayoridad magin an mga bago tanganing malikayan an danyos na pwedeng sapuon siring kan nangyari sa may parte kan Cebu kun saen an mga bagong patindog na edificio an naraot.
Sigun ki Robredo, panahon na tanganing tawan pansin an mga siring na problema o concern orog na mayo man makakapagsabi kun saen matama an makusog na linog kun kaya kinakaipuhan na masierto na salbado an gabos asin nakapreparar an publiko sa magigin epekto kaini.
Sa ngunyan, pig-enkaminar na sana kan alkalde an gabos na pirmeng pasiguro kan saindang mga buhay orog na sa mga dae piglalaoman na mga pangyayari.
