NAGA CITY- Pigrekognisar kan LGU-Naga an sarong 17-anyos an atleta huli sa inspirasyon na hatod kaini.
Sa pangengenot ni Naga City Mayor Leni Robredo, pigrekognisar kan siyudad si Albert Jose ‘TJ’ Amaro makalihis kaining maipuli an enot na gintong medalya kan Pilipinas sa 47th Southeast Asian World Aquatics Championship na pigkundusir sa Singapore kan Hunyo 19-29, 2025.
An siring na rekognisasyon obhetong ma-inspire pa an ibang mga jovenes asin mga atleta na gibuhon an saindang gabos na makakaya sa pag-abot kan saindang mga pangaturugan sa buhay.
Importante soboot na sa paagi kan rekognasyon na ini naipapahiling kan LGU-Naga an saindang pagsuporta sa mga jovenes o isay man na indibidwal na nagtatao nin onra asin nagseserbeng inspirasyon para sa iba.
Mientrastanto, antes kan pagsabak sa internasyunal na kumpetisyon, naipuli man ni Amaro an pitong gintong medalya sa Palarong Pambansa sa Cebu kan nakalihis na taon na nagin resulta man sa pagkakaigwa kaini nin tolong bagong national records.
Sa ngunyan, pigsierto na sana kan lokal na gobierno kan siyudad nin Naga na yaon an saindang bilog na pagsuporta sa mga atleta kan siyudad asin sa gabos na mga tawo na naglapigot tanganing makapagtao nin karangalan sa saindang lugar.
