NAGA CITY- Pigsaysay kan alkalde kan siyudad nin Naga na ipo-formalize na kan saindang lado an pagkriar nin price monitoring sa pigbabakal na suplay kan siyudad.
Sa nagin paghampang sa mga kagawad kan media ni Naga City Mayor Leni Robredo, sinaysay kaini na huli ta kadakol pigpu-purchase an Lokal na gobierno asin kadaklan sa mga ini haralangkaw an kantedad kaipuhan na pag-adalan an pagkakaigwa nin price monitoring tanganing makatipid asin mabudgetan nin tama.
Sigun pa ki Robredo igwang lima hasta anom na taon nang transaction alagad pigsisingil pa an presenteng administrasyon.
Pighihiling kan opisyal na sa laog kan 30 aldaw dapat mabayadan na an delivery kan supply na nareseber kan siyudad tanganing dae na pag-isipon pa sa mga masunod na aldaw.
Sigun kaya sa mga supplier mas mahal an singil sa siyudad huli ta nade-delay man an bayad.
Huli digde, susuguon kan alkalde an accounting, procurement, budget asin iba pang magkakanigong opisina tanganing pag-adalan nin marhay na masimbagan an usapin na ini.
Sa ngunyan, padagos an pagbilog nin mga programa kan lokal na gobierno kan siyudad nin Naga para sa ikakarahay kan mga Nagueño.
