NAGA CITY- Mahigot an seguridad na pigpapautob kan Libmanan Municipal Police Station ngunyan na holiday season.
Sa entrevista kan Bombo Radyo Naga ki Police Chief Master Sergeant Juan V Batolina, Spokesperson/PIO Libmanan Mps, sinaysay kaini na an saindang mga personahe an mahihiling sa mga tinampo kan saindang banwaan partikular sa places of convergences siring kan plaza.
Sigun ki Batolina, igwang pig-establisar na Police Assistance Desk na iyong matabang sa publiko enkaso kaipuhan kan mga ini.
Dugang pa kan opisyal, huli ta buru-bangi igwang pa-banda sa Plaza kaya kaipuhan an mahigot na pagbabantay kan mga kapulisan tanganing masierto na magin salbado an gabos.
Siringman, pigtutukan kan kapulisan sa banwaan nin Libmanan an Traffic monitoring sa National Highway kasabay kan pagdagsa kan mga biyahero gikan sa Metro Manila.
Importante soboot ini tanganing dae gayong mamatea an gabat kan trapiko asin malikayan an insidente sa tinampo.
Mientrastanto, pigsaysay man kan opisyal na mayo pa sindang namomonitor na nagtitinda nin paputok alagad enkaso igwa naman may area sana na pwedeng pag-pwestuhan kan mga ini.
Sa ngunyan, hagad na sana ni Batolina an pagsunod kan publiko sa piglatag na panundunan kan saindang lado tanganing malikayan an mga untowards incident ngunyan na holiday season.
