NAGA CITY-Limang katawo an binawian nin buhay mantang tolo pa man an irido huli sa banggaan sa Lopez, Quezon.
Binisto an mga biktima na binawian nin buhay na sina Cheska Brin Jucares, 28 anyos, residente kan Sta Cruz, Antipolo City, Rizal, alyas Jasper, sarong menor de edad, alyas Jarid, 8 bulan nin omboy, Riza Brin, 25 anyos, residente kan Brgy. Dela Paz, Antipolo, Rizal, asin man si Jaymar Orolfo Lunas, residente kan Antipolo, Rizal.
Irido man an mga biktima na sina alyas Julia, sarong menor de edad, Leopoldo Revilla Brin, 57 anyos, asin man si alyas Janella, sarong menor de edad.
Binisto man an suspek na si Ernesto Galvez Alberto, 51 anyos, residente kan San Pascual Hagonoy, Bulacan.
Sa nagunong impormasyon kan Bombo Radyo Naga sa Quezon Police Provincial Office, alas 2:15 soboot nin mainagahon ngunyan nin aga, Mayo 15, 2024, kan nakaresibe an Lopez Municipal Police Station nin apod kun saen nagkaigwa nin road crash incident sa Brgy. Canda Ilaya, Lopez, Quezon.
Tulos man na nagsiring an mga imbestigador kan nasambitang himpilan sa lugar.
Basado sa imbestigasyon kan mga awtoridad, aga ngunyang Mayo 15 sa Maharlika Highway na parte pa kan Brgy. Canda Ilaya, Lopez, Quezon, mantang binabagtas ni Julius Cano Brin, 32 anyos, residente kan Sta Cruz, Antipolo City, an agihan gamit an sarong tuktuk kan bigla na sanang tinamaan ini nin sarong Fuso truck na minamaneho ni Ernesto Galvez Alberto.
Huli igdi, nasulo an behikulo ni Brin asin nagbangga sa Yutong Bus na pigmamaneho ni Amor Atabillo Pedragosa, 47 anyos, residente kan Cupang, Antipolo City, rason tanganing masulo man an nasambitang bus.
Huli igdi, dead on the spot huli sa pagkasulo sina Cheska Brin Jucares, alyas Jasper, alyas Jarid, asin Riza Brin, mantang nadara pa man kudta si Jaymar Orolfo Lunas sa ospital alagad nagadan man sana ini mantang binubulong.
Irido man huli igdi sina alyas Julia, alyas Janella, asin Leopoldo Revilla Brin na pigdarara man sa ospital para sa tabang medikal.
Huli igdi, pigdara na an suspek sa Lopez Municipal Police Station para sa magkakanigong disposisyon.
