NAGA CITY- Pigheras kan sarong litigation lawyer an pwedeng mangyari enkaso mapasala nin paghatol an sarong judge sa kasong pigkakaputan kaini.
Sa entrevista kan Bombo Radyo Naga ki Atty. Elvin Villanueva, litigation lawyer, sinaysay kaini na an mga husgado an tawo man sana, boot sabihon enkaso nagkakaigwa nin paghatol sa kaso, nakadepende ini sa good faith, mayong malisya, mayong kaangutan asin basado sa naabot kan saiyang pag-aadal asin analysis.
Sigun pa ki Villanueva, enkaso siring kaini an magigin sitwasyon pwede man na i-appeal an kaso nin huli ta maikokonsederar soboot ini na error in jurisdiction.
Boot sabihon, dae narepresentar nin marhay an facts kun kaya nagkaigwa kan pig-aapod na error in jurisdiction.
Dugang pa kan abogado, dae sa gabos na oras, perpektong naitatao an marhay na hatol kun kaya igwa man nin mga paagi tanganing tawan nin tsansa na mag-appeal an sarong indibidwal.
Sa ngunyan, naglalaom na sana ini na mas maintindihan pa kan publiko an posisyon kan sarong judge nin huli ta bakong madali an saindang trabaho.
