Nag-anunsyo an lokal na gobyerno kan Ciudad nin Naga na papahingogon an mga lakdang ngani na mas mapakusog an pagresponde sa kasulo, orog na sa mga lugar na bakong madaling maabot kan mga fire truck.
Sa paghampang sa mga kagawad kan media ni Naga City Mayor Leni Robredo, pighayag kaini na kabale sa mga pangenot na lakdang iyo an pagbugtak nin tangke nin tubig na may mga hose asin trolley tanganing madaling maihatod sa mga congested o hararayong lugar. Nakikipagkoordinar man an ciudad sa Bureau of Fire Protection (BFP) para maaraman an mga lugar na may mayor na problema sa accessibility sa oras nin kasulo.
Sinabi pa kan alkalde na pigpreparar na an inisyal na pondo para sa pagbakal nin mga tangke nin tubig na pwedeng magserbing tulos na supply nin tubig sa panahon nin emerhensya. Tinawan niya nin duon na dakul pa an mga lugar sa Naga na dae maabot kan mga fire truck, kun kaya importanteng magkaigwa nin alternatibong paagi sa pagdara nin tubig asin pagresponde sa kasulo.
Kasabay kaini, ire-enact kan ciudad an lumang ordinansa manungod sa rain catchment facilities. An City Treasurer tinawan nin instruksyon na istriktong ipautob an pagsunod sa nasabing ordinansa. Segun sa alkalde, dapat magpoon an compliance sa City Hall asin mga barangay hall ngani na maseguro na igwang preparadong water storage facility na magagamit sa panahon nin kasulo.
Tinawang-duon man kan alkalde na saro sa mga nanunudan sa kasulo sa Palmera iyo an kawaran nin supply nin tubig asin an kadipisilan sa paglaog kan mga fire truck huli sa piot na tinampo. Huli kaini, plano kan ciudad na magbugtak nin tangke nin tubig sa mga lugar na nadedepisilan sa pagresponde sa mga bombero.
Mientrastanto, pag-uulayan man sa pagtiripon kaiba an mga punong barangay an mas mahigot na parking management sa mga subdivisions asin residential areas.
Segun sa alkalde, ulang an mga behikulo na nakaparada sa tinampo sa marikas na pagresponde sa sunog sa Palmera. Sa irarom kan proponidong manual operations, dae tutugutan an pagparada sa one-lane roads, mantang sa two-lane roads tutugutan sana an pagparada sa sarong lado asin sa mga itinalaan na oras. Ini parte kan mas mahiwas na programa kan ciudad para sa katatagan sa kalamidad asin pagpakusog kan pagigin andam sa kasulo.
