Naglansar an lokal na gobyerno kan syudad nin Naga nin sarong programa community-based mental health program na may katuyuhan na mapalawig an access sa mental health service sa barangay lebel. An programa na pigngaranan na “Angat Kahimate,” pig-iimplementar sa pakikipagtabangan kan Angat Buhay, Ateneo de Naga University, asin kan Department of Healt, bilang kasimbagan sa mandato kan ley na magin mas accessible sa komunidad an mental health services.
Sa entrevista kan Bombo Radyo Naga ki Naga City Councilor Gayle Abonal-Gomez, sinaysay kaini na piggigibo na ngonyan an pilot implementation kan programa sa Barangay Kararayan. Parte kan inisyatiba iyo an pagsasanay kan mga paratukdo asin mga estudyante gikan sa Ateneo de Naga University, kun saen an mga estudyante nagseserbing frontliners sa pagtao nin mental health interventions sa komunidad. Kabale digdi an mental health first aid asin pagkondusir nin home visit sa mga barangay health workers para ma-assess an kondisyon kan mga residentes.
Sa paagi nin pag-profile, an mga indibidwal na tibaad namemeligro o nangangaipo nin tulos na tabang namimidbid, dawa dai pa ninda ini narerealisar. Para sa mga nangangaipo nin mas mahiwas na interbensyon, sinda ibinabalyo sa sunod na lebel kan programa na inaapod na “Katatagan Plus,” kun saen sinda tinotokdoan nin mga kakayahan sa pagigin matatag sa irarom kan paggiya kan mga propesyonal na parakonseho sa sarong sentro nin salud nin isip.
Kun kaipuhan an mas halangkaw na lebel nin tabang, an mga kliyente pigrerefer sa mga psychologist asin psychiatrist, asin kun kinakaipuhan, sa mga ospital arog kan Bicol Medical Center. Igwa man nin mga libreng bulong na itinatao kan lokal na gobyerno, mantang an iba tinatabangan sa paagi nin medical assistance.
Pigtutukdo man kan mga opisyal na dawa mayo pa nin eksaktong datos sa total na bilang kan mga natabangan, padagos pa man giraray an pigkokompilar na mga record hale sa manlaen-laen na opisina arog kan City Health Office, CSWO, asin PDAO. Lininaw man na bukas sa gabos na edad an preventive measures kan programa.
Pigduduon kan lokal na gobyerno an importansya kan kooperasyon kan komunidad para maging epektibo an programa. An mga residente ineenkaminar na magrefer nin mga indibidwal na tibaad nangangaipo nin tabang, orog na ta an hababang gawi-gawi sa paghagad nin tabang asin an stigma na may koneksyon sa salud nin isip nagdadanay na mga angat.
Dugang pa, an kampanya padagos na nagpapataas kan kaaraman kan publiko na an salud nin isip bako sanang manungod sa mga helang kundi manungod man sa kabilogan na salud asin karahayan kan sarong tawo. Idinodoon man an kahalagahan kan pag-ataman sa sadiri, pagkua nin igong pahingalo, asin makosog na suporta hale sa pamilya asin komunidad.
An lokal na gobyerno naglalaom na sa paagi kan pinahiwas na mga serbisyo asin aktibong partisipasyon kan mga namamanwaan, an sistema nin pag-ataman sa mental health kan syudad orog pang mapakusog.
