NAGA CITY- Liwat na pigsalingoy ni Archbishop Rolando Tria Tirona kan Archdiocese of Caceres ang= mga recuerdos kan nagadan na si Cebu Archbishop Emeritus Ricardo Cardinal Vidal na bistado suboot komo “man of the poor”.
Sa entrevista kan Bombo Radyo Naga ki Archbishop Tirona, sinaysay kaining dae mawawara sa alaala kan mga namamanwaan si Cardinal Vidal huli sa pagiging harani kaini sa mga tios asin pagtatao nin mga inspirasyon sa mga tao.
Sigon sa Arsobispo, maikokonsiderar komo sarong ‘great humble leader’ an Cardinal na apwera sa pagiging leader kan simbahan an nagtindog man na boses kan namamanwaan urog na kan panahon kan Martial Law na idineklarar ni dating presidente Ferdinand Marcos.
Nakaibanan naman suboot niya an Cardinal sa mga pagtiripon sa Metro Manila kun saen nauugma siya tuyong magkakahilingan sinda huli ta nagbebeso pa sa saiya si Cardinal Vidal.
“We lost one of the pillars of Churches in the Philippines.” sigon ki Archbishop Tirona.
Sa ngonyan, nangangapodan an Arsobispo sa gabos na ipangadyi an kalag kaini asin ipagpadagos an magagayon na adal na pigwalat suboot kan nagadan na Cardinal.
