NAGA CITY – Mayo pa soboot nin napipili an Liberal Party kung siisay an susuportaran para sa House Speakership.
Sa entrevista kan Bombo Radyo Naga ki Camarines Sur 3rd District Rep. Gabby Bordado, sinaysay kaini na dawa pinag-uulayan na ninda kung siisay an tatawan nin suporta alagad sa ngunian mayo pa soboot nin pinal na desisyon gikan sa partido.
Sa ibong kaini, naglalaom man si Bordado na magigin magayon an pag-iribanan kan gabos sa irarom kan siisay man na matukaw komo House Speaker.
Napag-araman na kabale sa mga matanog na pangaran na nagmamawot na makua an posisyon sinda Representatives Lord Allan Velasco, Martin Romualdez, Congressman-elect Alan Peter Cayetano, reelected Davao del Norte 1st District Rep. Pantaleon Alvarez asin 3rd District Rep. Aurelio “Dong” Gonzales.
Mientrastanto, nanindugan man si Bordado na mayong nakaabot sa saiya kan soboot vote buying na nangyayari sa pagultanan kan mga lehislador para sa nasambitan ng posisyon.
