NAGA CITY- Nagpatanid an Land Transportation Office Bicol sa nasa 50 aktibong driving schools sa Rehiyon na striktong magsunod sa mga requirements kan theoretical driving course (TDC) para sa mawot magin mga lehitimong driver.
Sigun ki LTO-5 spokesperson Jamie Roperes na an ahensoya an maimplementar nin striktong pag-audit asin inspeksyon sa mga reports na pigsumiter kan nagkapirang driving schools na na-isyuhan nin certificates of completion sa mga estudyante na dae nag-atender nin klase o nagbagsak sa required assessments.
Sa irarom kan mandato kan pamayuhan kan LTO-5, an gabos na district asin extension office chiefs an igwang responsabilidad na magkundusir nin monthly audits sa gabos na na driving institutions sa saindang mga kanya-kanyang respetadong areas of responsibility.
Pigsaysay pa kan opisyal na an gabos na inspection teams na kinababalihan kan assistant chief asin license evaluator an makundusir nin inspections sa gabos na driving schools.
Iva-validate man an mga reports na nareseber dapit sa mga bayolasyon na nagdadarang peligro sa tinampo asin pagsierto kan integridad kan ahensiya.
Sa ngunyan, pigsierto kan opisyal na mapadagos an saindang pagmonitor asin pag-inspeksyon sa mga driving schools sa gabos na distrito asin extension offices tanganing mamantinir an malinig, credible, asin salbadong licensing system para sa gabos.
