NAGA CITY- Padagos an Land Transportation Office (LTO) sa saindang pigkukundusir na random drug tests para sa mga drivers sa Bicol Region komo parte kan saindang paglalapigot tanganing masierto an kasalbaduhan kan mga pasahero.
Sigun ki LTO-5 spokesperson Jamie Roperes, an lakdang na ini an parte kan obheto kan saindang ahensiya sa pagmantinir kan integridad para sa licensing system asin malikayan an paggamit nin illegal na droga kan mga drivers.
An nasambitan ng drug testing an padagos na pigkukundusir sa pakikipagtabangan sa Philippine Drug Enforcement Agency asin accredited drug testing laboratories.
An testing na ini an padagos na pigkukundusir sa mga terminals, bus asin truck stops, loading and unloading areas kan public utility vehicles, asin sa mga accident-prone areas.
Enkaso an mga drivers an magpositibo, iisyuhan nin show cause order an mga driver asin an saindang lisensiya an isasairarom sa preventive suspension sa laog kan 90 aldaw.
An mga aplikante an kaipuhan na magsairarom sa actual on-street driving examinations tanganing ma-test an saindang skills, disiplina asin respeto sa mga batas trapiko.
An LTO dae tutugutan an mga proxies o dae pag-atender asin an pagbalgar an maresulta sa tolos na disciplinary action.
Mientrastanto, an mga driving skills raters an papanimbagon enkaso mabigo ini asin an mga District Office chiefs an magigin deriktang responsable sa mga lapses sa implementation.
