NAGA CITY- Pigsierto kan LTO-Naga na bastante an suplay kan breath analyzer na gagamiton kan mga enforcer para sa Peñafrancia Fiestival.
Sa entrevista kan Bombo Radyo Naga ki Grace Rojas, LTO-Chief, sinaysay kaini na mas magigin mahigot an presensiya kan saindang mga personahe kaibahan an saindang katuwang na opisina sa mga tinampo tanganing mabawasan an aksidente.
Sigun pa ki Rojas, kadalasan kan mga nagbubungkaras na aksidente sa mga panahon na siribot an gabos asin masikip an tinampo kun kaya kaipuhan an saindang mga personahe tanganing magbantay sa mga hiro kan motorista.
Apwera digde, yaon man an pagpapagirumdom kan opisyal sa mga driver na dae na mag-inom kun mapuli pa sa hararayong lugar. An mayong kontrol sa pag-inom an nagkakawsa nin mga aksidente na pwedeng mapuli sa dae marhay na resulta.
Dugang pa ni Rojas, antes man na magbiyahe,siertuhon na nakapagrehistro na kan saindang mga behikulo asin dae pa expired an saindang mga lisensiya tanganing malikayan na ma-ticketan o mabugtak sa alanganin na sitwasyon.
Sa ngunyan, hagad na sana kaini an kooperasyon kan lambang mga motorista para sa salbadong biyahe kasabay sa pagselebrar kan Peñafrancia Fiesta.
