NAGA CITY – Nagpalabas na ng guidelines ang Land Transportation Office Region 5 para sa mga e-bikes dahil sa patuloy na pagtaas ng bilang ng mga nasabing sasakyan sa mga kalsada sa buong rehiyon.
Sa naging pagharap sa mga kagawad ng media ni Glenn Mancera, Chief of Operations Division ng LTO Region 5, sinabi nito na dahil hindi na nila mapipigilan ang pagdami ng mga ito, mas mabuting i-regulate na lamang ito ng ahensya.
Bukod dito, magkakaroon ng registration process para sa mga e-bikes, kung saan base sa guidelines basta ang battery electric vehicle ay dapat nakarehistro sa LTO.
Samakatuwid, ang driver ay dapat magkaroon ng lisensya, at ang mga kabataan ay hindi papayagang magmaneho sa kanila.
Ang mga three-wheeled e-bikes ay irerehistro bilang mga motorsiklo na may sidecars, habang ang mga two-wheeled na motorsiklo ay iuuri bilang mga motorsiklo.
Ang mga bagong rehistrasyon ay mayroon ding tatlong taon na bisa, ngunit ang kanilang problema ngayon ay ang mga in-use dahil kailangan nilang hanapin at iparehistro.
Dahil dito, magkakaroon sila ng kampanya na pumunta ang mga ito sa LTO sa kanilang libreng oras upang mairehistro ang uri ng sasakyan na kanilang minamaneho sa kanilang system.
Ang nasabing aktibidad ay magsisimula sa susunod na buwan dahil mayroon pa ring mga proseso ng accreditation na isinasagawa para sa mga 3rd party na gustong magbigay ng mga serbisyo ng stamping. Kung sakaling makapasa sila sa accreditation, awtorisado silang mag-stamp.
Binigyang-diin din ni Mancera na kahit nakarehistro ang mga e-bikes ay hindi pa rin sila maaaring makipagsabayan sa ibang sasakyan sa kalsada dahil sa bilis ng mga ito na mas mabagal pa rin kaysa sa iba.
Dahil dito, mananatili sila sa bike lane o sa mga inner side ng kalsada upang maiwasang magdulot ng trapiko at aksidente.
Kasabay nito, magiging mahigpit ang mga patakaran sa bike lane kung saan pagmumultahin ang sinumang mahuling pumarada sa mga ito. Samantala, patuloy na hinihimok ng opisyal ang lahat na laging sumunod sa batas trapiko.
