NAGA CITY- Naka-full alert status na an Police Regional Office Bicol asin nakatalaan na i-deploy an nasa 2,707 personnel sa manlaen-laen na lugar sa Rehiyong Bicol kasabay kan pag-obserbar sa All Saints’ asin All Souls’ Days sa Nobyembre 1 asin 2.
Marurumduman, tuyong Undas, ribong mga Bikolano an piglalaoman na mabisita sa mga sementeryo tanganing magtaong respeto sa saindang mga kaparientes na enot namang nagtalikod sa kinaban.
Katakod digde, pig-enkaminar ni PRO-5 Brig. Gen. Nestor Babagay Jr. an publiko na magtinir na alerto asin i-ireport an mga kahina-hinala na aktibidad.
Dugang pa kan opisyal, apwera sa numero kan mga personahe padagos soboot an pagbusol kan saindang lado sa commitment, disiplina asin dedikasyon kan kada kapulisan sa Rehiyon.
Mientrastanto, kabilugang 1,491 kapulisan an nakatuka na mag-operate kan police assistance desks na makukua sa mga sementeryo asin memorial parks.
Mantang an 479 na mga kapulisan man an an ide-deploy sa mga national highways asin iba pang lugar tanganing magmanehar kan motorist assistance desks.
An nasa 192 na kapulisan man an ibubugtak sa mga pangenot na transportation hubs, kabali na an bus terminals, airports, asin mga pantalan mantang an iba an matao nin seguridad asin asistensiya sa mga simbahan, pilgrimage sites, asin major tourist destinations.
