NAGA CITY-Nakumpiskar sa Sariaya, Quezon an pinagtutubudan na haros tolong milyong piso na kantidad nin ilegal na droga.
Binisto an suspek na si alyas Sharly, 43 anyos, residente kan Brgy. Lutucan Malabag, Sariaya, Quezon.
Sa nagunong impormasyon kan Bombo Radyo Naga sa Quezon Police Provincial Office, pig-arestar soboot an suspek makalihis na makabakal igdi an nagpamalo-malong parabakal kan mga awtoridad nin sarong pidaso nin heat-sealed transparent plastic sachet nin pinagtutubudang shabu.
Kan nagkondusir nin lawful search an mga awtoridad, nakua kan mga ini an buy-bust money asin sarong pouch bag na may laog nin duwang heat-sealed transparent plastic sachet nin pinagtutubudang ilegal na droga.
May gabat man soboot na 130 grams an nakumpiskar na pinagtutubudang ilegal na shabu, asin nagkakantidad nin ₱2,652,000.
Sa ngunyan, pigdara na an suspek sa Sariaya Municipal Police Station para sa magkakanigong disposisyon.
