Nagpakol na sa 132 an numero kan mga binawian nin buhay sa madugong police raid sa parte kan mga pobreng lugar sa Alemão asin Penha kan Rio de Janeiro, Brazil, susog sa public defender office kan nasyon.
Sigun sa mga report, ini na an pinakamadugong operasyon sa historya kan syudad na kun saen labi sa doble sa naenot na report na 58 an nagadan.
Kinumpirmar man ni Governor Cláudio Castro na padagos pang pig susuri kan mga forensic expert an mga naireport na nagadan asin pighurot kaining kadaklan sa mga nagadan sa nasambitan ng operasyon iyo an mga miyembro kan sindikato.
Basado man sa mga nagluwas na pahayagan asin storya kan mga saksi sa lugar na haros nagin soboot “gera” an nagin sagupaan kan mga pulisya asin mga armadong kalalakihan.
Gumamit pa soboot kan mga drone na may mga pampasabog an mga miyembro kan gang tangani atakihon an miyembro kan pulisya.
Kinondenar man kan United Nations Humans Rights Office an operasyon asin sinabing labi sindang nabigla sa hewas kan nagin kasahasan.
Sinaysay man ni Brazil President Luiz Inácio Lula da Silva na mismong ini an nabigla man asin labing nanghinayang huli ta dae soboot sinda nasabihan manungod sa mahewasang operasyon.
Sigun sa mga awtoridad, target kan operasyon an Red Command, sarong bistadong sindikatong nagpapabakal nin ilegal na droga. Katakod kaini apat (4) sa kabo kan pulisya man an kabali sa mga nagadan sa operasyon.
Marurumdumang an nasambitan ng raid an pirang aldaw antes na ikundusir sa syudad an C40 World Mayors Summit asin Earthshot Prize na aatendiran man ni Prince William kan United Kingdom
