Posibleng mahampang sa contempt of Congress sinda dating U.S. President Bill Clinton asin dating secretary of state Hillary Clinton kun dae sinda mahampang sa pagdagog kan Kongreso katakod kan imbestigasyon sa yumaong convicted sex offender na si Jeffrey Epstein.
Sigun sa report, ipinaapod kan House Oversight Committee an mag-agom na Clinton para sa closed-door depositions kan nakalihis na semana komo parte kan padagos na imbestigasyon dapit sa koneksiyon kan mga bistadong personalidad ki Epstein asin an pagkapot kan gobyerno sa mga impormasyong igwang kinaaraman sa saiyang ginibong krimen.
Piglalaomang matao nin testimonya si Bill Clinton kan nakalihis na Martes, mantang si Hillary Clinton man ngunyan na Miyerkules.
Siring man, dae pa kumpirmado kun maabot an duwa.
Enot nang inapodan si U.S. President Donald Trump para sa malinaw na transparency kan imbestigasyon makalihis na magluwas an U.S. Department of Justice (DOJ) nin sadit na parte kan mga dokumentong igwang kinaaraman ki Epstein, sarong bulan an ipigtalaang deadline kan mga kaso.
Nagdara ini nin pagkadismaya sa nagkapirang mga tagasuporta ni Trump, orog na sa mga nagtutubod na ginadan soboot si Epstein tanganing pagtakpan an soboot pagkakaimbwelto kan makapangyarihang mga indibidwal sa gobyerno—alegasyong pinahimutikan man kan mga ortoridad.
Napag-araman na kun padagos na dae masiport an mag-agom na Clinton, pwedeng magbusol an komite nin contempt of Congress resolution na kaipuhan pang aprubaran an bilog na House antes isumiter sa DOJ.
An criminal contempt of Congress sarong misdemeanor na igwang padusang hasta sarong taong pagkakakulong asin multang maabot sa $100,000, alagad nakasalalay pa man sa DOJ kung ipapadagos an kaso.
Napag-araman na nag-ugat an mga subpoena sa sarong unanimous bipartisan vote kan nakalihis na taon na nagsusugo sa komite na ribayan an testimonya kan mga presenten asin dating opisyal na igwang koneksiyon sa imbestigasyon ki Epstein.
Enot kudta ng nakatalaang magtestigo an mga Clinton kan nakalihis na Oktubre, 2025 alagad ipinagpauktaba ini mantang nakikiulay an saindang mga legal team sa komite.
Mientrastanto, kinuwestiyon man kan kampo ni Hillary Clinton kun tano ini ipinaapod, asin pighurot na dae malinaw an koneksiyon kan saiyang testimonya sa imbestigasyon.
Si Epstein, na dating igwang koneksiyon kina Trump asin iba pang prominenteng personalidad, na nahatulan nin sex crimes asin kalaunan, inarestar sa soboot sex trafficking kan mga menor de edad.
Nagadan ini sa laog kan kulungan kan taong-2019 makalihis soboot mag-suicide bagay na tinutulan kan publiko.
Makalihis liwat magtukaw sa pwesto kan nakalihis na taon, marurumdumang nagpromesa si Trump na iluluwas an mga Epstein-related files alagad kalaunan binawi ini asin sinabi na mayo na soboot importanteng impormasyon dapit sa mga ini.
Sa ibong kaini, nagluwas man an DOJ nin enot na batch kan mga dokumento kan nakalihis na Disyembre, 2025, na pigkakarkulong nasa sarong porsiyento sana kan kabilogang case file.
Kaibahan sa mga iniluwas na dokumento an mga ladawang kua ki Bill Clinton kan enot na parte kan 2000s, antes pa man nahampang sa kaso si Epstein.
Maduon na pinahimutikan kan dating Presidente an anuman na salang gawi asin pighurot na dae kaini aram an mga krimen ni Epstein asin haloy na soboot kaining pinutol an koneksiyon digde antes maarestar.
