NAGA CITY- Desperadong lakdang na suboot an pigigibong sunod-sunod na pag-atake kan rebeldeng New People’s Army (NPA) sa mga tropa kan gobyerno.
Ini tangani na maipahiling suboot sa publiko na makusog pa an saindang pwersa.
Ini an tinawan duon ni Col. Paul Regencia, spokesperson kan 9th Infantry Division, Philippine Army sa pakikipag-olay kan Bombo Radyo Naga.
Pahayag ini ni Regencia katakod kan nangyaring pananambang sa sarong CAFGU sa parte kan Del Gallego, Camarines Sur asin harrassment sa Casay detachment sa banwaan nin Lupi.
Segun ki Regencia, an sunod-sunod na pag-atake kan mga NPA sarong pagpapamate na yaon pa an saindang presensya urog pa ta harani na an saindang anibersaryo sa Marso 29.
Prangkang sinaysay kan opisyal na mayong ibang magibo an mga rebelde kundi an mang-harass asin magplano kun papano manggagadan nin mga CAFGU asin soldados siring man an paghahatod nin bayolensya asin kariribokan.
Mientrastanto, pigsierto man ni Regencia na apwera sa duwang CAFGU na nairido sa nangyaring harassment, nasa maray na kamugtakan an mga soldados na nagtitinir sa Casay Detachment huli ta nadepensaran man ninda an saindang kampo.
