Kinondenar kan nagkapirang lider kan transport group an soboot iresponsableng pahayag ninda Ka Obet Martin, Boy Vargas asin Marlyn Ramos sa pangapudang patalsikon sinda Land Transportation Franchising and Regulatory Board (LTFRB) Chairman Teofilo Guadiz III asin Regional Director Zona Tamayo.
Ini an kasunod kan isinagibong press conference kansuarin sana dapit sa Public Transport Modernization Program.
Sigun ki Ka Lando Marquez, lider kan Liga ng Transportasyon at Operators sa Pilipinas (LTOP), obheto kan isinagibong pulong balitaan na ipangapudan an pagpapakusog kan nagkapirang programa kabali na an loan moratorium, dugang na equity subsidy, pagbaba kan fuel subsidy threshold, asin dugang na pondo para sa service contracting program.
Mayo soboot sa plano an ano man na pangapudang pagbubutas kan mga opisyal kan LTFRB asin inapod ninda ining mayong basehan, opportunistic asin makasadiri na obheto soboot na guluhon an reporma asin pugulan an pag-uswag kan PTMP.
Huli digde, mayo nin lalaomang suporta gikan sa sainda an ano man na banta kan strike o pangapudan para sa pagbaba sa puwesto ninda Guadiz asin Tamayo.
Inaanunsyar man ninda an pagtiwalag sa grupong dating binisto komo “Magnificent 7” na nagamit sana soboot komo personal na organisasyon kan mga indibidwal na piniling itaguyod an kariribokan imbes na solusyon.
Sa ibong kaini, sarong national organization an binilog na kababalihan na kan mga representantes gikan sa sektor kan tricycle operators, truckers asin mga bus operators.
