Pigyugo-yugo kan makusog na magnitude 8.7 linog an sirangang parte kan Kamchatka Peninsula sa Russia ngunyan na aldaw.
Sigun sa US Geological Survey, an linog an nangyari sa rarom na 19 kilometro asin pigkakarkulong ng 136 kilometro sirangan kan syudad nin Petropavlovsk-Kamchatsky.
Huli sa kusog kan pagyugo-yugo, nagluwas nin tsunami advisory an mga awtoridad sa Japan, Alaska, Hawaii, asin nagkapirang parte kan Pacific Islands.
Nilalaoman kan Japan Meteorological Agency an pag abot kan tsunami na may langkaw na 1 metro sa nagkapirang baybayon kan Japan.
Sa Russia, nagkapira man na establisyemento an nadanyaran kabali na an sarong kindergarten kun saen salbado man na naibakwar an mga tao antes na bumagsak an mga pader.
Mayong nairehistro nin binawian nin buhay, alagad padagos pa an pagmamanman sa mga aftershock asin posibleng dugang na danyos.
Nagluwas man nin tsunami watch an Hawaii Emergency Management Agency komo pag-iingat sa posibleng epekto sa baybayon.
An linog an parte kan aktibidad sa Kuril-Kamchatka Trench, sarong bistadong subduction zone sa rehiyon.
Nagkaigwa nin mga foreshock antes man an nagin linog, kabali an sarong magnitude 7.4 na pagyugo-yugo kan nakalihis na Hulyo 20.
Inabisuhan man an mga residente sa mga apektadong lugar na magtinir na alerto asin sundan an mga opisyal na abiso gikan sa mga awtoridad.
