NAGA CITY- Pupuonan na kan Maharlika Investment Corportation (MIC) an pag-invest kan Maharlika Investment Fund sa huring parte kan taon.
Sa pre-State of the Nation Address (SONA) briefing, sinaysay ni MIC President asin CEO Rafael Consing na kapot na ninda an P75 billion na capital contributions gikan sa mga bangko asin ngunyan an nasa pangangataman kan Bureau of Treasury na itinalagang interim cash manager.
Sigun ki Consing, kabali sa mga premirong proyektong lalagakan kan puhunan an renewable energy, digital connectivity, asin healthcare. Orog na soboot sa aspeto kan transmission lines sa island provinces tanganing mapababa an presyo kan kuryente, mantang mag-iinvest man sinda sa pagpapatindog kan mga tower para sa digital infrastructure, asin pag-upgrade sa mga ospital asin clinic kan mga lokal na gobierno.
Nagdesisyon soboot sinda na an mga sektor na kaipohan kan nasyon an premirong bubuhuhan kan puhunan, asin enkaso magkita na ini o magkaigwa nin sobrang kita an saka iluluwas sa nasyon an pamumuhunan.
