Piglansar kan Bureau of Internal Revenue (BIR) an mahewasang crackdown laban sa mga pekeng person with disability (PWD) identification cards (ID). Ini makalihis na matukoy kan ahensiya an labing pag-abuso digde asin ginamit komo panibagong scheme kan tax evasion.
Segun ki BIR Commissioner Romeo Lumagui Jr., pigsugo kaini an gabos na internal revenue officials na makipag-ulay sa manlaen-laen na ahensya kan gobyerno tanganing maibitaran an paglakop asin paggamit kan mga pekeng PWD ID.
Basado sa datus kan 2023, nag abot sa P88.2 billion an soboot nawaran na kita kan nasyon huli sa paggamit nin pekeng ID. Sa irarom kan ley, an mga PWD igwa nin 20% na diskwento asin exemption sa value-added tax (VAT) sa nagkapirang produkto asin serbisyo komo dagdag na benepisyo.
Alagad sinabi ni Lumagui na igwang mga indibidwal na nag-aabuso kaini sa paagi kan paggibo nin mga pekeng PWD ID, paggamit kaini asin ipinapabakal an natatada sa siisay man na gustong mag-avail nin PWD benefits.
An siring na mga ID, bako sana sa tinampo ipinapabakal kundi magin sa mga online marketplace kaya orog na magigin accessible para sa sisay na gustong magbakal.
Nagpatanid an commissioner na an paggamit nin pekeng PWD ID sarong klase nin tax evasion, bagay na iimbestigaran man kan BIR.
Makondusir man soboot an BIR nin audit sa mga establisemento tanganing ma-verify kun tunay an mga PWD ID na saindang pigkokonsiderar na isumiter sa internal revenue body.
