Pigsaayos na kan Department of Education (DepEd), katuwang an Commission on Higher Education (CHED) asin Technical Education and Skills Development Authority (TESDA), an K to 12 curriculum tanganing tugunan an isyung dae pa preparado sa trabaho an dakol na senior high school graduates.
Sigun ki Education Secretary Sonny Angara sa Malacañang press briefing, puon sa 33 asignatura sa presenteng curriculum, lima na sana an magigin required subjects, mantang an iba magigin electives tanganing matawan an mga estudyante nin mas dakol na pagpipilian asin dae nakapokus sa sarong track.
Pigtawan duon ni Angara an importansiya kan flexibility, orog na sa panahon kan artificial intelligence, kun saen pupwedeng sabayan an skills training asin academic subjects.
Papapusogon man kan DepEd an ugnayan sa industriya tanganing masiertong tugma sa trabaho an mga kasanayang pigtutukdo sa eskwelahan.
Dugang pa ni Angara, palalawigon an job immersion puon 300 oras hasta 640 oras, o haros sarong semester kan aktuwal na eksperyensiya sa trabaho.
Nagtutubod an DepEd na an mga pagbabagong ini an mapreparar sa mga estudyante para sa trabaho o kolehiyo, asin matao nin mas malinaw na dalan pasiring sa saindang kinabukasan.
