Malaki ang ibinaba ng gastusin ng pamahalaang lungsod ng Naga matapos ipatupad ang mas mahigpit at masusing proseso sa bidding at procurement, ayon sa pamunuan ng lungsod.
Mula sa dating itinakdang limitasyon na ₱250 para sa bawat pagkain o meals, bumaba sa humigit-kumulang ₱120 na lamang ang karaniwang gastos dahil sa mas kompetitibong bidding process. Samantala, ang mga meryenda o snacks na dati ay walang itinakdang limitasyon ay nilagyan na ng ceiling na ₱120, subalit umaabot lamang sa average na ₱70 ang aktuwal na gastos dahil sa mas maigting na kompetisyon sa mga supplier.
Sa pagharap sa mga Kagawad ng Media ni Naga City Mayor Leni Robredo, nagresulta ito sa higit sa 50 porsiyentong pagtitipid sa pondo ng lungsod nang hindi isinasakripisyo ang kalidad ng mga serbisyong ibinibigay sa publiko.
Gayunman, inamin ng pamahalaang lungsod na nagdulot din ang mas mahigpit na pagsusuri ng mga dokumento ng pagbagal sa pagproseso ng mga papeles sa Bids and Awards Committee (BAC) at procurement office. Ipinaliwanag ng mga opisyal na bunga ito ng mas mataas na antas ng pag-iingat upang matiyak na walang anomalya o katiwalian sa paggamit ng pondo ng bayan.
Binigyang-diin din ng pamunuan ang mahalagang papel ng Internal Audit Service (EAS) sa pagtukoy at pag-iimbestiga sa mga iregularidad sa loob ng City Hall. Bagama’t may mga naitalang kaso ng maliliit na katiwalian, kinakaharap umano ng lungsod ang hamon ng umiiral na mga alituntunin ng Civil Service na nagpapahirap sa agarang pagpapatalsik sa mga sangkot na empleyado.
Upang higit pang mapalakas ang transparency at accountability, pinalawak ng lungsod ang Project Monitoring Team sa pamamagitan ng pagsama ng mga kinatawan mula sa mga professional organizations at sa Naga City People’s Council (NCPC).
Isa sa mga naging bunga ng pinalakas na monitoring system ay ang mahigpit na pagbabantay sa konstruksyon ng Naga City General Hospital. Ayon sa mga opisyal, napigilan ang ilang kahilingan para sa karagdagang bayarin o “extra work” at napapanagot ang contractor sa mga problemang natukoy sa proyekto.
Samantala, inaasahang kikilos ang Sanggunian, Human Resource Management Office at City Legal Office upang tugunan ang mga ulat at rekomendasyon ng EAS kaugnay ng mga natukoy na paglabag at iregularidad.
Sa kabila ng mas mabagal na proseso sa ilang transaksyon, naninindigan ang pamahalaang lungsod na mas mahalaga ang maingat at transparent na paggamit ng pondo ng bayan kaysa sa panganib na makalusot ang katiwalian at pag-aaksaya ng pondo ng mga mamamayan.
