NAGA CITY- Pigtawan duon kan pamayuhan kan Tinago National High School na dakula an katabangan kan paggamit nin makabagong teknolohiya sa pagtutukdo sa mga estudyante.
Sa entrevista kan Bombo Radyo Naga ki Rick Ruizo, an Principal 1 kan Tinago National High School, sinaysay kaini na kaipuhan sa presenteng panahon orog na sa pagtutukdo an makabagong teknolohiya tanganing magin globally competitive an mga estudyante asin dae nawawalat sa mga innovation sa kinaban.
Sigun pa sa opisyal, kadakol sa mga eskwelahan sa nasyon an nahuhuri kun pag-uulayan an paggamit nin makabagong materials para sa pagtutukdo na nagreresulta sa hababang kamalayan kan mga estudyante.
Huli kaini, kaipuhan na akuon kan gabos na kaipuhan talaga an siring na pagbabago tanganing mas magin meaningful asin interesting an laog kan klase orog na ta haros gabos na mga kajovenan sa presente an matibay sa paggamit kan saindang mga gadgets asin manlaen-laen pa na makabagong teknolohya.
Alagad siring kan ibang mga bagay kaipuhan man an limitasyon sa paggamit kaini, nin huli ta an anuman na sobra an bakong marhay maski sa anupaman na sitwasyon.
Sa ngunyan, naglalaom na sana si Ruizon na magin bukas an gabos sa pagbabago tanganing mas magin competitive an mapo-produce na mga graduates gikan sa nasyon.
