NAGA CITY – Padagos na pigtutukdo sa sa mga paratanom sa Calabanga, Camarines Sur an makabagong teknolohiya sa pagtanom, para sa mas marhay na produksiyon kan mga Agri- products.
Sa entrevista kan Bombo Radyo Naga ki Adonis Aguilar Jr., Municipal Councilor kan LGU Calabanga, sinaysay kaini na padagos an saindang pagheras nin suporta asin geya sa mga paraoma, asin parasisira partikulamente na ta ngunyan na aldaw, nagkaigwa nin pagtiripon an mga vegetable growers kan pirang barangay sa banwaan. Kun saen, pigreport kaini an mga nahaman na trabaho asin ordinansang naipasar kan nakalihis na tulong taon.
Sa nasambitan naman na pagtiripon, pigheras man kaini an padagos na pagtutulod kan patraining partikulamente an pagtatanom gamit an mga makabagong teknolohiya.
Kun makanood man an mga ini, mas madakol an produksyon kan mga paraoma na maresulta tanganing magdakol man an saindang mga kita, na saro sa pinakaobheto kan nasambitan ng programa.
Mientrastanto, nagkakaigwa man nin Full study group sa saindang banwaan kun saen pigtitiripon an mga vegetable growers asin nagkukundusir ni field training asin field study.
Digdi man, pig-aadalan kun pano an paggamit kan mga bagong makinarya, makabagong pagtatanom, asin pig-aaraman kun ano an mga huma na makakahampang kan sarong paraoma.
Sa presente, igwa paman nin nagtitinir na nagtatanom kan dating nanundan kan mga nakalihis pa na panahon o an saindang pig-aapod na old school. Alagad padagos an saindang ginigibo na matukdoan an mga ini kan makabagong pagtatanom tanganing makasabay sa panahon.
