NAGA CITY- Makalihis an haros duwang magkasunod na pananambang sa tropa kan kapulisan sa Camarines Sur, dagos nang ni-relieved an Provincial Director kan Camarines Sur Police Provincial Office (CSPPO).
Suodma kan pigkondusir an turn over of command sa CSPPO kun saen pigsalidahan ni PS/Supt. Engelbert Soriano an dating Provincial Director na si PS/Supt. Reynaldo Pawid.
Sa paghampang ni Soriano sa kapulisan, pigsierto kaini na ipagpapadagos niya an mga magagayon na bagay asin polisiya sa laog kan saindang linyada.
Pigsierto kaini na dae na mauutro pa an nangyaring pananambang sa mga kapulisan urog na sa tahaw kan mga police operations.
Marurumduman na haros magkasunod sana an nangyaring pananambang sa Lupi, Camarines Sur kun saen, tolong pulis an nagadan asin apat na iba pa an nairido mantang nasundan man ini kan ambush na nairehistro sa banwaan nin Libmanan, kun saen anom na pulis man an nairido.
An nasambitang magkasunod na pananambang sa kapulisan an enot naman na inako kan mga rebeldeng New People’s Army.
