Makakalaom an publiko kan padagos na pagkrear kan gobyerno nin manlaen-laen na oportunidad para sa trabaho asin hanapbuhay kan mga Pilipino.
Ini an pahayag kan Malacañang makalihis mag-angat sa 96.2% an employment rate o antas kan mga Pilipinong may trabaho kan Pebrero, gikan sa 95.7% kan Enero.
Sigun ki Palace Press Officer Claire Castro, patunay an pag-angat kan employment rate sa marhay na pamamalakad kan gobyerno tanganing matawan nin pagkakataon an mga Pilipinong makapagtrabaho asin makapaghanapbuhay.
Pigsierto kan Palasyo an padagos na pagpapautob kan mga programa asin pagbubukas kan mga oportunidad, orog na sa mga benepisyaryo kan Pantawid Pamilyang Pilipino Program (4Ps) asin iba pang nagtetios na sektor.
Sa datos kan Philippine Statistics Authority (PSA), nagbaba man sa 3.8% an unemployment rate o antas kan mga mayong trabaho kan Pebrero, gikansa 4.3% kan Enero.
Siringman an underemployment rate o mga may trabaho alagad bakong bastante an pigkikita, na gikan sa 13.3% nagbaba man sa 10.1%.
