Nagbwelta an Palasyo sa nagin pahayag ni Vice President Sara Duterte katakod kan naglolobong utang kan Pilipinas.
Sa sarong rally sa Australia, kinuwestiyon ni VP Sara an labi 16 trilyong utang kan nasyon asin sinaysay kaining dae man namamatean kan publiko kun saen napapasiring an utang.
Sigun ki Palace Press Officer Claire Castro na bako sana sa presenteng administrasyon nag-ugat an nasambitan ng utang.
Sinaysay ni Castro na as of June 2022 antes magtukaw si Presidente Ferdinand Marcos Jr. sa pwesto nasa 12.79 trilyon na an utang na winalat kan Duterte Administration.
Kun saen, nagpakol soboot sa 6.83 trilyon an inutang sa panahon ni dating Presidente Rodrigo Duterte, katampad kan 115.1% na paglangkaw kumparar sa mga naenot na administrasyon.
Sigun sa Palasyo, naghihingowa an gobyerno na malikayan an labi na pag-uutang sa paagi kan pagpapakusog kan ekonomiya asin marhay na pagkolektar kan buwis.
Siring man, aminado si Castro na igwang mga pagkakataon siring kan panahon kan krisis na dae malilikayang mangaipuhan nin dugang na pondo an gobyerno.
