NAGA CITY- Lubog na ngunian sa baha an 13 sa 27 mga Barangay sa ciudad nin Naga maging an 10 banwaan sa probinsya nin Camarines Sur huli sa mayong untok na bulos kan uran gikan pa kasubanggi.
Sa entrevista kan Bombo Radyo Naga ki Ernesto Elcamel, pamayo kan City Disaster Risk Reduction and Management Office (CDRRMO), sinaysay kaini na kadaklan sa mga primer na tinampo ngunian sa ciudad dai na man suboot maagihan huli sa paglangkaw kan lebel kan tubig.
Katakod kaini, sinugo na man ni Mayor John Bongat an mga Barangay official sa mga binabahang lugar na pig-ibakwar na an apektadong mga residente.
Meintrastanto, nagpakol na man sa sampulong banwaan sa Camarines Sur na kinababalehan kan Pamplona, San Jose, Tigaon, Lagonoy, Minalabac, Bombon, Garchitorena, Gainza, San Fernando asin Pasacao an nakakamati na man ngunian nin pagbaha.
Sa banwaan nin Lagonoy, napag araman na lagpas tao na an langkaw kan tubig na naging rason kan dikitan na pagkalamos ni Burabod Barangay Chairman Arnold Bacares mantang pinupurbarang i-rescue an nagkakapirang mga apektadong residente.
Stranded na man an mga pribado asin pampasaherong lunadan paluwas asin palaog sa 4th district kan probinsya huli sa pag-apaw kan tubig sa mga tinampo.
Nairehistro na man an pagtupas kan daga sa mga banwaan kan Presentacion asin Sagnay.
Nagpaotob na man ngunian nin mandatory evacuation si Camarines Sur Governor Migz Villafuerte sa gabos na mga low-lying asin landslide prone areas sa probinsya.
Mahigot na mang pinaotob ngunian sa probinsya an no sailing asin no island hopping policy.
Pinag-iingat man ngunian kan mga otoridad an publiko huli sa mga nagruruluwasang halas, ipis, kino asin iba pang insekto gikan sa mga binahang lugar.
