NAGA CITY – Padagos an pigsasagibong paglilinig sa Barangay Pacol sa siyudad nin Naga orog na ngunyan na nararani na an kralasehan asin ngunyan na nakakaeksperyensiya nin pag-uuran.
Sa entrevista kan Bombo Radyo Naga ki Jerry Aspe, Barangay Kagawad kan Pacol, Naga City, sinaysay kaini na nagtatarabangan an manlaen-laen na grupo sa saindang barangay sa pagmantinir kan kalinigan tanganing makalikay sa mga helang na makukua tuyong tag-uran siring na sana kan dengue.
Sigun ki Aspe, importante na namamantinir an kalinigan orog na ngunyan na balik klase na an mga aki tanganing dae makapagrehistro nin mga kaso kan dengue na peligroso man sa salud kan mga estudyante asin kan gabos na mga tawo.
Katakod kaini, yaon an pakiualay kan opisyal sa gabos na makipagtabangan sa saindang lado tanganing mahali na an mga pinag-iistaran kan mga lamok asin masierto na malinig an kada sulok kan saindang lugar.
Mientrastanto, pigsaysay man kan opisyal na bastante an suplay kan tubig sa saindang lugar na kun saen an iba an gikan sa potable waters mantang an iba an gikan sa mga traditional na balon.
Mayo man soboot nairehistro na kontaminadong tubig. Sa ngunyan, hagad na sana ni Aspe an pakikisumaro kan saindang mga residentes tanganing mamantinir an kalinigan kan saindang lugar.
