Nag-aandam an Municipal Agriculture Office asin lokal na gobyerno kan San Fernando para sa posibleng epekto kan El Niño phenomenon, partikularmente sa supply nin tubig asin produksyon kan mga paraoma.
Sa intrevista kan Bombo Radyo Naga ki Allan Salvador, Municipal Agriculturist Officer kan banwaan nin San Fernando, Camarines Sur, sinabi kaini na importante na mag-andam an mga paraoma sa piglalaoman na kakulangan nin tubig na posibleng makaapektar sa saindang mga pananom.
Pig-eenkaminar man an mga paraoma na magkua nin crop insurance tanganing magkaigwa sinda nin tabang pinansyal enkaso magkaigwa nin danyos o pagkawara kan saindang mga pananom huli sa grabeng tigmara.
An total na hiwas kan mga oma sa banwaan nasa laog nin mga 1,600 ektarya, na kun saen sobra sa 1,000 ektarya an mga lugar na may patubig. Labing 500 ektarya an mga lugar na pinapauran, na mas nakadepende sa pag-uran para sa suplay nin tubig.
An nagkapirang patubig na oma na nagsasarig sa mga sanga, salog asin sapa apektado man kan hababang lebel kan tubig. Igwa man nin nagkapirang lugar na naggagamit nin sistema nin patubig na pinapaandar kan saldang, dawa ngani limitado pa an saindang sakop.
An mga lugar na may rain-fed farming areas iyo an mga parte kan Planza, Pamukid, Santa Cruz, Bonifacio asin Lupi. Segun sa opisina, igwa nin rain-fed areas sa gabos na 12 barangay na may rice-producing areas sa banwaan.
Tanganing maiwasan an posibleng pagkalugi, an mga teknisyan sa agrikultura sa kada lugar padagos na nagpapalakop nin impormasyon asin rekomendasyon sa tamang preparasyon asin teknolohiya na magagamit kan mga paraoma sa panahon kan El Niño.
Nangapudan an lokal na gobyerno sa mga paraoma na makipagtabangan sa Municipal Agriculture Office asin iba pang ahensya kan gobyerno, siring man magsunod sa mga programa na may katuyuhan na mamantenir an produksyon, ingreso asin kabuhayan kan mga paraoma sa ibong kan huma nin makuring tagtuyot.
