NAGA CITY– Sa ibong kan pag-ugma kan kadaklan sa pagkagadan ninda Isnilon Hapilon asin Omar Maute, nakakamati man nin kadikit na kamunduan an nagkakapirang Maranao sa kinahantungan kan duwa.
Sa entrevista kan Bombo Radyo Naga ki Tata Dibarata, tubong Marawi City, sinaysaya kaini na presente sindang nagtitinir sa ciudad nin Naga huli sa kariribukan sa nasambitan ng lugar.
Sigon ki Dibarata, komo sarong Maranao, natural na sa sainda an makamati nin kamunduan tuyong may nagagadana na Muslim alagad garo kapadusahan na sana para sa mga ini an kagadanan huli sa dinara kaining kariribukan sa ciudad.
Sa likod kaini, nauugma si Dibarata huli ta hudyat na man suboot ini kan dagos nang pagtatapos kan giyera sa saindang lugar asin pwede na sindang magbwelta sa Marawi asin mamuhay nin normal.
Meintrastanto, nangapudan man si Dibatara sa iba pang natatadang rebelde na magsurender na tanganing mas maparikas na an pagtatapos kan nasambitan ng kariribukan.
