NAGA CITY- Target suboot kan Armed Forces of the Philippines (AFP) na makalihis na sa huring parte kan bulan nin Oktubre ngonyan na taon an nagpapadagos na krisis sa Marawi City.
Ini an sinaysay ni Maj. Gen. Restituto Padilla, tagapagtaram kan AFP sa ekslusibong entrevista kan Bombo Radyo Naga.
Ginigibo suboot ninda an gabos para dae na mag-abot pa sa bulan nin Disyembre an kariribukan sa nasambitang ciudad.
Nagsayuma man si Padilla na magtao nin eksaktong petsa kun nuarin matatapos an krisis alagad mawot kaini na matuldukan na ini ngonyan na bulan.
Iaanunsyar na sana suboot kan militar kun tapos na asin sierto ng salbado an bilog na Marawi sa kamot kan mga terorista.
Enot kaini, sinaysay ni Padilla na dawa diit na sana an nadadangog na purutukan sa laog kan main battle area, nagpapadagos pa nanggad an mas pinahigot na clearing operations kan mga militar para masierto na mayong nakakalat na mga improvised explosives device (IED) asin mga patibong na pigwalat an mga terorista sa Marawi.
