Pigsierto ni Senate Committee on Finance Chairman Sherwin Gatchalian, an marekas na pagpapatindog kan mga klasrum sa bilog na nasyon sa irarom kan prosopwestong 2026 national budget.
Pigtawan-duon ni Gatchalian na an paghihingowa na ini an obhetong simbagan an pangangaipuhan para sa mas kadakol na klasrum tanganing suportaran an edukasyon kan mga kaakian.
Sigun ki Gatchalian, igwang nakatagamang pondo na nag-aabot sa P85 bilyon sa irarom kan enrolled bill kan 2025 bidget na eksklusibong nakatuon sa pagpapatindog asin pagpapakarhay kan mga klasrum sa manlaen-laen na antas.
Gikan sa kabilogang kantidad na P85 bilyon, an P65.9 bilyon an partikular na pigtagama para sa pagpapatindog, pagriribay, asin pagkumpleto kan mga establisyementong pang-eskwelahan hasta high school.
Kaibahan man sa pondong ini an pagpapatindog kan mga technical-vocational laboratories na obhetong magtao nin mga kagamitan asin pasilidad na kinakaipuhan para sa mga estudyanteng nag-eeskwela kan mga kursong teknikal asin bokasyonal.
Ini an sarong importanteng lakdang tanganing masierto na an mga estudyante an igwang access sa modernong kagamitan asin pasilidad na makakatabang sa saindang pag-eskwela.
Dugang pa kan senador, pigtawan-duon man ninda an importansiya kan aktibong pagpartisipar kan manlaen-laen na sektor sa pagpapatindog kan mga klasrum.
