An Amerikanong siyentipiko na si Margaret Hamilton, na parte kan paggibo kan sistema nin kompyuter para sa programa lunar kan NASA na Apollo, nagadan sa edad na 90.
An Massachusetts Institute of Technology o MIT, kun saen nagtukdo si Hamilton poon 1959 sagkod kabangaan kan dekada 1970, nagkumpirma na an siyentipiko nagadan kan Setyembre 30.
Bisto si Hamilton bilang saro sa mga pinakaenot na programmer asin pinakaenot na babaeng programmer na nagin parte kan programang Apollo, an makasaysayan na misyon na nagdara kan pinakaenot na tawo sa bulan.
Si Oliver de Weck, propesor kan Apollo Program asin pansamantalang pamayo kan MIT Department of Aeronautics and Astronautics, nagduon kan mahalagang kontribusyon ni Hamilton sa paggibo kan saro sa pinakakomplikadong sistema nin kompyuter sa kasaysayan.
Si Hamilton, bilang sarong inhenyero sa software kan mga enot na taon kan programa kan Apollo, pinangenotan an saiyang grupo sa paggibo kan software na sarong mahalagang parte kan misyon.
An hepe kan NASA na si Jared Isaacman nagtao man nin pag-omaw ki Hamilton sa paagi kan X, na dating Twitter, bilang pagmidbid sa saiyang mga kontribusyon sa siyensya nin kompyuter asin pag-eksplorar sa espasyo.
Si Hamilton tinawan nin Presidential Medal of Freedom kan 2016 kan dating Presidente kan Estados Unidos na si Barack Obama huli sa saiyang mga kontribusyon sa programang Apollo.
