Dae na naitago kan US maritime expert an pagkadismaya sa pig-aabot na batikod kan Philippine Coast Guard (PCG) na saiyang pigkokonsiderar na pinakamatapang na kabuhan kan coast guard sa kinaban.
Si Ray Powell, Executive Director kan Sealight Foundation, an nagpahayag nin matinding pagkabahala sa mga akusasyon na piggagapo kan nagkapirang politiko sa Philippine Coast Guard.
Enot digde, sinaysay ni Cavite Rep. Kiko Barzaga na dapat ng buwagon an PCG huli sa naglalalang sitwasyon sa West Philippine Sea.
Inapod man ni Powell na “shameful slander” an mga paratang na nagsasabing an PCG an nagseserbi sa banyagang interes.
Sigun sa US maritime expert, mayong ibang coast guard sa kinaban an regular na naghahampang sa aggression gikan sa pinakadakulang paramilitary maritime force kan China.
Sa ibong kan peligro, nagtitinir na kalmado asin propesyonal an PCG mantang pigbubusol an derechos kan Pilipinas sa West Philippine Sea.
Pigtawan-duon kaini na an PCG an bako sanang tagapagtanggol kan teritoryo kundi tagapangataman man kan kabuhayan kan mga parasirang Pilipino.
Sa paghiling kan eksperto, an PCG an huwaran kan katapangan, disiplina, asin integridad na dapat ipag-orgulyo kan lambang Pilipino.
