NAGA CITY – Nag-abiso an Maritime Pulis Camarines Sur na ipauktaba paramientras an paglawod huli sa raot kan panahon na dara ni bagyong Nika.
Sa enterevista kan Bombo Radyo Naga ki PCpl Jeanet Cantillo, Assistant PCR PNCO, pigsaysay kaini na nagbaba na nin gale warning an coast guard manungod sa biyahe kan mga bangka, barko asin ano pa man na mga lunadang pandagat.
Dugang pa kan opisyal, magkakaigwa soboot sinda nin meeting kan mga ahensiya sa Pasacao asin papag-ulayan kun ano an magigin aksiyon manungod sa papaabuton na bagyong si Nika.
Katabang man sa pagmantinir kan kasalbaduhan kan mga pasahero sa dagat an Philippine Coast Guard (PCG), PNP Maritime asin an Philippine Ports Authority (PPA).
Mientrastanto pagirumdom pa man kan ahensiya para sa mga sararadit na lunadan pandagat asin mga parasisira na dae na muna maglawod tangani man na malikayan an ano man na aksidente sa tubig asin kamawotan na sana kaini na nasa marhay na kamugtakan an gabos orog na igwang pigpabantayan na raot kan panahon.
