NAGA CITY- Pigsierto kan Makabayan bloc sa Kongreso na kikwestyunon ninda sa plenaryo an proklamasyon kan Martial Law sa parte kan Mindanao.
Sa entrevista kan Bombo Radyo Naga ki Bayan Muna partylist Rep. Carlos Isagani Zarate, sinaysay kaini na nakaandam an saindang grupo na kwestyunon sa maabot na Lunes an nasambitang deklarasyon.
Aaramin man suboot ninda ano an naging basehan ni Presidente Rodrigo Duterte sa proclamation no. 216 o an pagdedeklarar nin Batas Militar sa parte kan Mindanao.
Sigon ki Zarate, mahigot na kinokondenar kan Makabayan bloc an bayolensya sa ciudad nin Marawi asin kontra man sinda sa naging desisyon kan presidente sa pagsasairaom digdi sa batas militar.
Ini huli naman sa mga paghandal sa posibilidad na pagbalgar sa mga diretsos humanos asin an pag-abuso kan mga soldados asin mga kapulisan.
